မြွေအရေခွံတပ် ဦးခေါင်း

လက်ရှိစိတ်ခံစားမှုအခြေအနေနဲ့ အဆင်ပြေဆုံး၊အထိဆုံးကဗျာတစ်ပုဒ်ပါ..။ကဗျာလဲမတင်ဖြစ်၊မမျှဖြစ်တာ
ကြာပြီနဲ့မို့...ဒီလထုတ်ချယ်ရီမှာ ပါတဲ့ကဗျာတစ်ပုဒ်ကို တင်ဖြစ်ပါတယ်။အားလုံးနားလည်လက်ခံပေးကြမယ်လို့ မျှော်လင့်ပါတယ်။

မြွေအရေခွံတပ် ဦးခေါင်း

ဒီနေ့
ပျော်ရွှင်မှုထိပ်ဆုံးစာရင်းမှာ
ကိုယ့်နာမည်ပါသလား။
တစ်ခုပြီးတစ်ခု မပြည့်နိုင်တဲ့ ကမ္ဘကြီးထဲ
ခပ်ထည့်မိတာနည်းနည်း
ခပ်သောက်မိတာများများ
ခပ်မိတာချင်း ခတ်ခဲ့မိတော့
အခက်သား။
အသက်မပါတဲ့ ဖဲအပွင့်ကိုဆက်ဆွဲ
ရွှေကိုရွှေနဲ့
ငွေကိုငွေနဲ့
ငါးစာတပ်ပြီး မျှားနေရတဲ့ မြစ်ပြင်ထဲမှာ
အာဟာရနဲ့ ထောက်ကူပေးထားရတဲ့ အရေပြား
နက်တယ်။
ကျောနံပါတ် ၁၀၉၊၁၁၀
ပြောင်းရွှေ့ကြေးလိုသလောက်ရတဲ့သူပဲ
ကိုယ်တိုင်ခြေထောက်နဲ့ ကစားရတာထက်
အပျော်အခလေးကြေးတင်လိုက်
အဲသလိုကစားနည်းကြိုက်သူဘေးမှာ
အိမ်မက်တွေ တွန့်ကြေနေရတာနဲ့
ဘယ်တော့မှ မမေ့နိုင်တော့ဘူးနဲ့
ဟုတ်လား ဆွီတီ။
ဆိုကတည်းက
ငါဟာ ငတုံးငအတစ်ကောင်ဆိုတာ
ဝန်ခံပါတယ်။
အမေ့အိမ်မှာ
ပြန်မပြောနားမထောင် ခြေလက်သုတ်သင်
ကျောလျားရှည်ကြီးနဲ့
ငါတော့ခက်တယ်တဲ့။
အမေမကြာခဏ
အော်ဟစ်ဆူခဲ့ရတဲ့ငါဟာ
အမေရှိရင် ထမင်းရှိတယ်။
အမေရှိရင် ငွေရှိတယ်။
အဆင်မပြေဘူးလား။
ဆိုမှတော့
ခုလို အဆင်မပြေချင်ရင်
ရေသောက်တာလည်း သွားကြားညှပ်တာပဲ။
မိုးထဲရေထဲ ဖိနပ်ပြတ်တယ်။
အချစ်မကြိုက်တဲ့ဆံပင် ရှည်ရှည်လာတယ်။
မီးစာလည်းကုန်ပြီ
ရေကလည်း ခန်းပြီ။
ငွေသံကြေးသံတစ်ချွင်ချွင်ဂီတနဲ့
မကခုန်နိုင်တဲံ ဒီနေ့
ဘောက်ဆူးမရတော့တဲ့ စားပွဲထိုးလေးကအစ
ရေခဲသေတ္တာထဲက တစ်ရေးနိုးလာတဲ့ အသားတစ်စ
မျက်နှာပေးမျိုး
" ဟေ့လူကြီး ခင်ဗျားဘာသောက်မှာလဲ"
ကျေးဇူးပြုပြီး
လူ့ပေါ်ကြော့တစ်ယောက်မှာလည်း
ပြုပြင်မှုယန္တရား မထားရဘူးလား။
ငါပေးခဲ့တဲ့ အချစ်နာမည်မပြောင်းလိုက်နဲ့ ကေသီ
ငါပေးခဲ့တဲ့ ကျောနံပါတ် ၂၃ အင်္ကျီပြန်မပေးခဲ့ပါနဲ့ ဂျော်နီ
ငါဖြောင့်ပေးခဲ့တဲ့ အချစ်ဆံပင် ပြန်မကောက်လိုက်ပါနဲ့ ဟန်နီ။
ပျံကျ ညနေခင်းလေးမှာ
ဝေ့၀ဲတိမ်းရှောင်သွားကြသော
လူမှုဘာသာဗေဒအခင်းအကျင်းများ
ဝမ်းနည်းလက်စလမ်းပေါ်
ပျော်ရွှင်မှုထမင်းဟင်းလေးများတွေ့ဖို့ရာ
ကျွန်တော် အိမ်ပြန်နောက်ကျပါမယ်
မေမေ။ ။

စောနဒီ(မြစ်ကြီးနား)