ဒီနေ့မြင်သမျှ.... ဒီနေ့ကြားသမျှ..ဒီနေ့တွေးမိသမျှ

နာနတ်တောဂုံးကျော်တံတားအောက်က ဗဟိုလမ်းမပေါ်မှာ၊အတိအကျဆိုဂုံးတံတားနဲ့ပရီမီယာဘီယာဆိုင်ကြား။ ဗဟိုလမ်းမရဲ့ ဘယ်ညာတစ်ဖက်တစ်ချက်ဆီမှာ...အပေါ်အင်္ကျီဗလာနဲ့..
ခါးဝတ်ပုဆိုးကိုခါးတောင် မြောင်အောင်ကျိုက်လို့..အမျိုးသားတွေဟာ...မိုးဖွဲဖွဲအောက်မှာ..လက်တွေကို မိုးပေါ်ထောင်ပြီး ဘာတွေများ တောင်းဆိုနေပါလိမ့်လို့ မြင်မြင်ချင်းမှာ အတွေးဝင်မိတယ်..။

ကိုယ့်အတွေးနဲ့ကိုယ်မို့ပါ..။တကယ်တော့ သူတို့က သူတို့အလုပ်သူတို့လုပ်ကြတာပါ။ရန်ကုန်မြို့မှာ ဘယ်နေရာမှ မတွေ့မိသေးတဲ့ ဓာတ်ဆီ၊ဒီဇယ်ရောင်းနည်း အသစ်ပါ။ကားလမ်းမရဲ့ တစ်ဝက်လောက်မှာ နေရာယူ၊ မတ်တပ်ရပ်ပြီး ဖြတ်သွားဖြတ်လာ ကားကြီးကားငယ်ကို..လက်ညှိုးတစ်ထောင်ထောင်နဲ့...ဆီရောင်းဖို့ အော်ခေါ် နေကြတာပါ..။အကြမ်းအရမ်းမောင်းလာမယ့် ကားအန္တရယ်၊ကားပေါ်က ဆရာသမားများရဲ့ ဆဲရေးတိုင်းထွာသံ..
အဲ့ဒါတွေကို ဂရုစိုက်စိတ်ပူနေဖို့ မအားဘူး။ဆီရောင်းရဖို့ကသာ အဓိက။

************************************

အာရှတော်ဝင်ဆေးခန်းကြီးရဲ့...အထူးကြပ်မတ်ကုသဆောင်ရှေ့မှာ...မရိတ်တာကြာပြီဖြစ်တဲ့နှုတ်ခမ်းမွေးစစနဲ့..
အရောင်မထွက်တော့တဲ့ ပလေကပ်ပုဆိုးကိုဝတ်ထားတဲ့ အမျိုးသားတစ်ဦး။သူ့ရှေ့ကြမ်းပြင်ကိုမျှော်လင့်တကြီးနဲ့
ငေးစိုက်ကြည့်နေတယ်..။အခန်းထဲမှာတော့ ပက်လက်ဖြစ်နေတဲ့၊ပါးစပ်ဟောင်းလောင်းပွင့်အာနေတဲ့ လူမမာအဖိုးအိုတစ်ဦး..။

နောက်ပြီး ................

"အိုဆရာနော်..သူများကကိုယ့်ဆရာမို့....ကိုယ်နောက်တာ..။ဆရာကမကြိုက်လဲ နောက်ဘယ်တော့မှ မနောက်တော့ဘူး။ဘ၀ပဲ ဘ၀ပဲ...သိလား ဘ၀ပဲဆိုတာ ဘာပြောတာလဲကိုရော...ဘ၀နဲ့ချီပြီးမှတ်တယ်လို့ ပြောချင်တာ။"

ပါးစပ်ထဲကို ယင်ကောင်ဝင်ဥတော့မယ့်...လူမမာကရော ဘ၀တစ်ခုကူးတော့လေမလား..။တစ်နေ့ကို သုံးလေးသောင်းနီးပါး အခကြေးငွေယူတဲ့ ဆေးခန်းကြီးတွေရဲ့ သူနာပြုဆရာမလေး နဲ့ တာဝန်ကျဆရာဝန်ဆီက ကြားရတဲ့အသံတွေရယ်......။

***************************************

ကမာရွတ်လှည်းတန်းလမ်းမဟာ အရင်ကနဲ့မတူတော့ဘူး။မြန်မာပြည်နဲ့ဝေးနေတဲ့သူတွေ ခုနေခါပြန်လာမိရင်...
ဟင် ..ဒါလားဟဲ့ လှည်းတန်းဆိုပြီး...တမော့တမော.....နဲ့...ငေးရင်းမောရင်း သတိကြီးစွာနဲ့ လမ်းလျှောက်တတ်ပါမှ
ဖြစ်မယ့်အထိ စည်ကားများပြားရှုပ်ထွေးပွေလီ လှပါတယ်..။

ရော်နာဒို၊မက်ဆီ၊အင်နီယေစတာစသဖြင့် သူတို့တွေဘောလုံးကစားကြတဲ့အခါမှာ ဘော်လုံးကို ဗယ်ဘက်ပဲ ထုတ်တော့မလို၊ညာဘက်ပဲထုတ်တော့မလို နဲ့ နောက်ဆုံးမှာ ဘော်လုံးကိုရှေ့ကိုအရင်ကန်ထုတ်တတ်တယ်။ ဒီလိုမှမဟုတ်လဲ ဘော်လုံးနောက်ကိုပဲ လိုက်တော့မလို အရင်ဆုံးကိုယ်ယောင်ပြတယ်။ပြီးကာမှ မလိုက်ပဲ ဘေးဘက်ကပွတ်ပြီးဆွဲတက်သွားတယ်..။အဲ့လိုမျိုးစတိုင်နဲ့ လမ်းလျှောက်တတ်ပါမှ...ကမာရွတ်လှည်းတန်းကို လာခဲ့လို့ရမယ်..။မဟုတ်ရင်တော့...ရေတစက်စက်ကျနေတဲ့ထီးတွေရဲ့ အစွန်းတွေနဲ့ ကိုယ့်မျက်လုံးထိုးမိကောင်း
ထိုးမိနိုင်တယ်။

ကိုယ်ကရှောင်နေရဲ့သားနဲ့ ဘုန်း...အင့်ဆိုပြီး တစ်ကိုယ်လုံးနီးပါးနဲ့ ၀င်ဆောင့်တာမျိုးလဲ ရှိတတ်တယ်။

ဆုတ်..ဆုတ်...ဆုတ်..။ပါကင်၊ပါကင်..ဟေး မြန်မြန်လျှောက်..ဒီမှာကားပါကင်....ဆိုတာမျိုးလေးတွေကလဲ နားဝင်ပီယံ...။

အဆိုးဆုံးကတော့ မြောက်ဥက္ကလာ-သိရိမင်္ဂလာဈေးသွားတဲ့ ၁၀၂ ဒိုင်နာနဲ့ မှော်ဘီ၊ပဲခူး၊တိုက်ကြီး-သိရိမင်္ဂလာဈေးသွားတဲ့ ဟိုင်းလက်စ်ကားလေးတွေပါ..။ကျောချမ်းတယ်ဆိုတာ ဘယ်လိုအချိန်မျိုးကို ခေါ်တာလဲ့ မသိပါ။ကမာရွတ်လှည်းတန်းလမ်းမပေါ်မှာတော့ တကယ်ကျောချမ်းစရာကောင်းပါတယ်။

ကားတိုက်ခံရမလိုဖြစ်ဦးမလား။အင်အားကြီးနဲ့ အင်အားငယ်..လမ်းပေါ်ကလမ်းလျှောက်သူတွေသာ အမနာပ အဆဲအဆိုခံရမယ်။ဘုကြည့်ပြန်မကြည့်မိပါစေနဲ့...။ကားပေါ်က ကားဆရာရော၊ကားနောက်လိုက်ပါ သံချောင်းကိုင်ပြီး ဆင်းလာပါလိမ့်မယ်..။သည်းခံခြင်းသည်သာ ကိုယ့်လက်နှက်၊ကိုယ့်ပိုင်ဆိုင်မှု.....။

ထို့အပြင်...ကျွန်ုပ်တို့ ဘာများတတ်နိုင်လိမ့်မည်နည်း...။

ဂဏန်းသင်္ချာ

9-3=5.5
(ကိုးအနှုတ်သုံးညီမျှခြင်း ငါးဒဿမငါး)

ကျမဆယ်တန်းတုန်းက သင်္ချာဂုဏ်ထူးရခဲ့တာ...အစစ်အမှန်မှဟုတ်ရဲ့လားလို့ ကိုယ့်ကိုယ်ကိုသံသယ၀င်မိတယ်.။

အပြန်ပြန်အလှန်လှန်ကြိုးစားကြည့်ပြီးပြီ..။ဘာကြောင့် ၅ ဒဿမ ၅ ပဲရနေရတာပါလိမ့်ပေါ့..??????
(ဒီလောက်လွယ်တဲ့ ဂဏန်းသင်္ချာကိုလေ...)

အစ်ကိုတို့၊အစ်မတို့လဲ ၀ိုင်းစဉ်းစားပေးခဲ့ကြဦးနော်..။

မုဒုံ ရက်စွဲများ

သင်္ကြန်အကျနေ့မှာ သူတို့တွေ အပြင်ထွက်လည်ဖြစ်ကြတယ်။မုဒုံသူရဲ့အဒေါ်က ကားစီစဉ်ပေးတယ်။အဲ့ဒိနေ့က မိုးကတဖွဲဖွဲရွာနေတယ်။စိတ်ရှိလက်ရှိ ခိုင်းချင်တိုင်းခိုင်းထားလို့ ကျနေတဲ့ ကားအကောင်းစားတွေ၊ ထော်လာဂျီ ယာဉ်တွေ၊သုံးဘီးတပ်ဆိုင်ကယ်တွေ၊အိတ်ဇောသံတဗျင်းဗျင်းနဲ့ ဆိုင်ကယ်တွေ..၊အီမိုလူငယ်တွေ.......။ အဲ့ဒါတွေကြည့်ပြီး စိတ်ကူးကိုရွက်လွှင့်မိခဲ့တာ....ကျိုက္ခမီရေလည်ဘုရားနဲ့ စက်စဲကမ်းခြေထိရောက်ခဲ့တယ်...။

ကျိုက္ခမီရေလည်ဘုရား

ကျိုက္ခမိရေလည်ဘုရားနားကလှမ်းမြင်ရတဲ့မြင်ကွင်းတစ်ခုပါ။
လှလဲသိပ်မလှသလို အဲ့ဒီကမြင်နေရတာဟာ ဘာမှန်းလဲသေချာမသိခဲ့ရပါဘူး။သို့ပေမယ့်အဲ့ဒိနေ့က မိုးတွေညိုပြီး
တစ်ယောက်ယောက်ကို လွမ်းနေတဲ့သူ့အတွက်တော့ ဒီမြင်ကွင်းကလဲ လွမ်းစရာပါပဲ။


စက်စဲကမ်းခြေအတွင်းသို့ မည်သည့်ကားမှ ၀င်ရောက်ခွင့်မရှိဆိုလို့ သူတို့တွေ ကားဆီကနေကမ်းခြေကိုရောက်ဖို့ ၅ မိနစ် လောက်လမ်းလျှောက်ခဲ့ရတယ်။ဒါပေသိ ဒီလိုကားကြီးတွေန့တော့ ဒီလိုတွေ့ရသေးတတ်တာပဲလေ။
ဘယ်သူတွေလဲ၊ဘယ်သူ့ကားလဲဆိုတာတော့ ချွင်းချက်အနေနဲ့ မပြောတော့ဘူးနော်၊

သံဖြူဇရပ်စစ်သင်းချိုင်းရှေ့က ကျောက်ထွင်းထားတဲ့စာ...။

ဒီမှတ်တိုင်ရဲ့ အသက်က ၂၂ ပဲရှိသေးတယ်။အသက် ၁၈ နှစ်ကနေစပြီး အသက် ၄၀ လောက်ထိအကြီးဆုံးလို့ ပြောလို့ရတဲ့ လူငယ်၊လူရွယ်တွေဟာ အဲ့ဒိရထားလမ်းမအတွက် သူတို့အသက်တွေရင်းခဲ့ရတယ်..။


သင်္ကြန်ရဲ့ ပူပြင်းခြောက်သွေ့အထီးကျန်လှသော ညများကို မုဒုံမြို့မှာ ကုန်လွန်ခဲ့တယ်။


ဒါကတော့ ခရီးသွားဖို့ ၁ လလောက်အလိုထဲက ကြိုတင်ရင်ခုန်ခဲ့ရတဲ့ မုဒုံမြို့ရဲ့ သင်္ကြန်မောင်များဖြစ်ကြပါတယ်။

ဆိုင်ကယ်မှာ စတစ်ကာကပ်တာ၊ဆိုင်ကယ်ကို အိတ်ဇောဖြုတ်ပြီး တဗျင်းဗျင်းအသံမြည်အောင်လုပ်တာဟာ သူတို့မြို့သင်္ကြန်ဖက်ရှင်ရေစီးကြောင်းတစ်ခုလို ဖြစ်နေပြီ မုဒုံသူကတော့ပြောရဲ့၊

အားလုံးလိုလိုကလဲ မူးနေသလို၊ အော်ဟစ်ဆူပူနေကြတာမို့ အိမ်အပြင်ကိုထွက်ပြီးဓာတ်ပုံမရိုက်ရဲခဲ့ဘူး။ ဂျောက်ဂျက်သီချင်းထဲကအတိုင်းတွေ့သမျှ မိန်းကလေးကိုဘယ်သူလေးလဲလို့မေးကြတယ်။သူ့အတွေးဆီရောက်လာတာက သြော် ဒါလေလား ဂျောက်ဂျက်ရဲ့ ဘ၀၊ဒါလေလား ဂျောက်ဂျက်ရဲ့ မကျေနပ်ချက်တွေလို့လေ..။
ဒါကြောင့် ဓာတ်ပုံရဲ့အလည် တည့်တည့်မှာမှာ ဓာတ်မီးတိုင်ကြီးက ရောက်နေတယ်.. :)

ဒီလိုပြင်ဆင်ပြီး သင်္ကြန်ကျ ကြတယ်။

ဒီလောက်နဲ့ပဲနားပါဦးမယ်...။ကော်နက်ရှင်လဲကောင်းရင်၊ဓာတ်ပုံချိတ်လို့လဲအဆင်ပြေမယ်ဆိုရင်...
မုဒုံမြို့အဇင်းဆည်သွားခရီးနဲ့ မြ၀တီ၊မဲဆောက်ဘက် အမှတ်တရ၊နောက်ပြီး ပြာသိုအဖြစ်ဘ၀ပြောင်းသွားရှာတဲ့
ဘလော့ဂါမောင်မျိုးနဲ့ တွေ့ဖို့ကြိုးစားခန်းတွေပါ ဆက်ပါဦးမယ်..:)

မှတ်ချက်။ ။ကျမပိုစ့်တိုင်းမှာ ဆက်ဖတ်ချင်ရင်ဆိုတဲ့ Read more တွေပေါ်နေလို့ ကိုယ်တိုင် စိတ်အနှောက် အယှက်ဖြစ်ရပါတယ်။ဒါကိုပြင်နေတုန်းပဲ ရှိပါသေးတယ်။
မနေ့ညကလဲ ပြင်ဆင်ရင်းစမ်းသပ်မိလို့ ပိုစ့်တစ်ပုဒ်တခြားလူတွေဆီမှာ သွားပေါ်နေလို့ အားနာမိပါတယ်။
ဒီပိုစ့်မှာလဲ ပေါ်နေဦးမယ်ထင်ပါရဲ့။သည်းခံတော်မူကြပါကုန် :P

ဥပဒေဆိုတာ ဘာလဲဗျာ

ကျမနေတဲ့ ရပ်ကွက်ထဲမှာ ဒီမနက်မှ မြင်ခဲ့ရတဲ့မြင်ကွင်းတစ်ခုပါ။

စမြင်မြင်ချင်းမှာက ဗမာအမျိုးသားတစ်ယောက်ကနိုင်ငံခြားသားတစ်ယောက်ရဲ့ မေးရိုးကိုဖျတ်ခနဲလှမ်းကိုင် လိုက်ပြီး မျက်နှာကိုလက်သီးနဲ့ ထိုးမလို့။ဒါပေမယ့် ဘေးနားကဗမာမ တစ်ယောက်က၀င်ဆွဲလိုက်တာနဲ့ မထိုးဖြစ် လိုက်ဘူး။အဲ့ဒိအချိန်မှာ ဗမာအမျိုးသားက ပြောလိုက်တာက "အဲ့ဒါဆိုခင်ဗျားပြောပေးလေ"တဲ့။ ဘာဖြစ်တာလဲ ...ဘာဖြစ်တာလဲ.။သေချာမသိပါ။လူတွေနဲနဲဝိုင်းအုံတာနဲ့အတူ သူတို့နားလဲ ကပ်မနေရဲတာနဲ့ သူတို့နဲ့ခပ်လှမ်းလှမ်းဆီကို ထွက်လာခဲ့တယ်။

ခဏနေတော့ သူတို့ သုံးယောက်က ၀ိုင်းကြည့်နေတဲ့လူအုပ်ကြီးကို ထားခဲ့ပြီးထွက်သွားတယ်။အမှန်တကယ်က
သုံးယောက်လုံးထွက်သွားတာမဟုတ်ဘူး။နိုင်ငံခြားသားရယ်၊ဗမာမရယ်က ထွက်သွားလို့ နောက်ကနေ ဗမာအမျိုးသားက လိုက်သွားတာ။ရှေ့က ၂ ယောက်ကအပြေးတပိုင်းနဲ့သွားတယ်။နောက်ကလူကလဲ မှီအောင်လိုက်တယ်။

ကျန်ခဲ့တဲ့လူအုပ်ထဲဆီက ကြားရတာက ကားခညှိမရလို့ ပြဿနာတက်ကြတာပါတဲ့..။

သူတို့ကျမမျက်စိရှေ့နေ ခဏပျောက်သွားတယ်။ ၁၀ မိနစ်လောက်အကြာမှာ ဗမာအမျိုးသားတစ်ယောက်ထဲ ပြန်လာတယ်။ဒေါသတွေ တထောင်းထောင်းထွက်လို့။ကျမ အစ်ကိုက သွားစပ်စုတယ်။သူပြန်လာတော့မှ စေ့ငုံအောင်ကြားရတော့တယ်။

အဖြစ်အပျက်က ဒီလိုပါ။ဗမာအမျိုးသားက taxi driver ။သူတို့ ၂ ယောက်ကတစ်မနက်လုံးသူ့ကားကို ငှားထားခဲ့ပါသတဲ့။ဈေးကိုလဲ လမ်းတိုလေးတွေ ဟိုသွားဒီသွားမို့လို့ ၅၅၀၀ ဆိုပြီးညှိနှိုင်းထားခဲ့ကြပါသတဲ့။

သူတို့လဲ ကားပေါ်ကဆင်းရော ကားဆရာက ၅၅၀၀ တောင်းပါတယ်။ဒါကို နိုင်ငံခြားသားက မပေးပဲ ၃၀၀၀ ပဲပေးပါတယ်တဲ့။"မင့်ကားက မီတာတပ်ထားတဲ့ကား။ဒီတော့ မီတာအတိုင်းအတွက်သင့်ကျပဲ ပေးမယ် "ဆိုပြီး ၃၀၀၀ ပဲပေးပါတယ်တဲ့။(မီတာက ၅၀ တစ်မီတာကို ဘယ်လောက်။စသဖြင့် ဒါမျိုးတွက်ကြတာလားတော့ မသိပါဘူး)ဒါကြောင့် ကားဆရာက စိတ်တိုပြီး ရန်ဖြစ်ကြတာပါပဲ။(ဒါတွေဟာကျမတို့ အစိုးရရဲ့ ပဲကြီးဟင်း သောက်ထား တဲ့အလုပ်တွေရဲ့ နောက်ဆက်တွဲတွေပါ)

ကားဆရာအပြောအရဆိုရင်တော့ သူနဲ့သေချာညှိနှိုင်းခဲ့တဲ့ ဗမာမကလဲ ခုကျတော့ ဘာမှဝင်မပြောတော့ပဲ ကျနော်ကလဲ အင်္ဂလိပ်လိုမတတ်တော့ ဘယ်လိုသွားပြောမလဲ။အဲ့ဒါ သူတို့ကထွက်သွားမယ်ဆိုတော့ကျနော်က မော်တော်ပီကယ်ဆီ(ပရုပ်လုံး)ခေါ်သွားတာပါ။အဲ့ဒါကို ဆရာသမားများကလဲ "မင်းလဲ သူပြောတာ နားမလည်ဘူး။" "အေး ငါတို့လဲ နားမလည်ဘူး။ဒီတော့ ငါတို့လဲ ဖြေရှင်းမပေးနိုင်ဘူး။ သူပေးသလောက်ပဲ မင်းယူ" လို့ ဆိုလိုက်ပါသတဲ့..။

"ဥပဒေ ဆိုတာ ဘာလဲဗျာ " ဆိုပြီး ပြောပြောဆိုဆိုနဲ့ ကားဆရာလေးခမျာထွက်သွားပါတော့တယ်...။
ကဲ.... "ဥပဒေဆိုတာ ဘာလဲ "....လို့....ဘယ်သူ့ကို ကျမတို့မေးလို့ရနိုင်မလဲ......။